Which country was the first in the American continent to Eliminate leprosy?

Subject : GS - विज्ञान आणि तंत्रज्ञान - रोग आणि आजार

सरळसेवा, रेल्वे, तलाठी, वनरक्षक, पोलीस भरती, अग्निवीर , SSC GD, MPSC, UPSC परीक्षेसाठी विचारलेले / संभाव्य महत्त्वपूर्ण प्रश्न

प्रश्न) अलिकडे कोणता देश अमेरिकन खंडातील कुष्ठरोग (Leprosy) निर्मूलन करणारा पहिला देश ठरला आहे ?

1. चिली

2. ब्राझील

3. अर्जेंटिना

4. पेरू

उत्तर : चिली

📰 बातमी काय ?

• जागतिक आरोग्य संघटना (World Health Organization) आणि पॅन अमेरिकन हेल्थ ऑर्गनायझेशन (Pan American Health Organization) यांनी चिलीला कुष्ठरोग निर्मूलनासाठी प्रमाणित केले आहे.

• त्यामुळे चिली हा अमेरिकन खंडातील पहिला देश आणि जगातील दुसरा देश ठरला आहे.

(नोट : कुष्ठरोग दूर करणारा जगातील पहिला देश जॉर्डन आहे)

कुष्ठरोग कशामुळे होतो तो कसा पसरतो ?  

• कुष्ठरोग हा मायकोबॅक्टेरियम लेप्रे (Mycobacterium Leprae) या जिवाणूमुळे होतो.

• हा आजार मुख्यतः त्वचा, नस (nerves), डोळे आणि श्वसनमार्गावर परिणाम करतो.

• नाक आणि तोंडातून थेंबांद्वारे जिवाणू प्रसारित केले जातात.

• हस्तांदोलन करणे किंवा कुष्ठरोग झालेल्या व्यक्तीला मिठी मारणे, एकत्र जेवण करणे किंवा एकमेकांच्या शेजारी बसणे यासारख्या अनौपचारिक संपर्कातून हा रोग पसरत नाही.

कुष्ठरोगाचा शोध कोणी लावला ?

• इ.स. 1873 मध्ये नॉर्वेतील वैद्य गेरहार्ट हेन्‍रिक आरमौअर हान्सेन (Gerhard Henrik Armauer Hansen) यांना प्रथम ऊतींच्या नमुन्यात कुष्ठरोगाचे जीवाणू आढळले. 

• या जीवाणूंमुळे कुष्ठरोग होतो, असे त्यांनी इ.स. 1874 मध्ये सिद्ध केले.

• त्यांच्या या शोधामुळे कुष्ठरोगाला हान्सेन रोग (Hansen Disease) असेही म्हणतात.

🌍 चिली देशाबद्दल थोडक्यात माहिती : 

• चिली हा दक्षिण अमेरिका खंडातील एक देश आहे.

• तो अँडीज पर्वतरांग (Andes Mountains) आणि प्रशांत महासागर (Pacific Ocean) यांच्या दरम्यान लांब आणि अरुंद पट्ट्यासारखा पसरलेला आहे.

• राजधानी → सॅंटियागो (Santiago)

🔑 परीक्षेच्या दृष्टीने IMP रिव्हिजन पॉईंट्स : कुष्ठरोग निर्मूलन

• कुष्ठरोग निर्मूलन करणारा → चिली (अमेरिकन खंडातील पहिला देश)

• जागतिक स्तर → चिली जगातील दुसरा देश 

• प्रमाणन → World Health Organization + Pan American Health Organization

• कुष्ठरोग कारणीभूत जीवाणू → मायकोबॅक्टेरियम लेप्रे

• कुष्ठरोगाचा शोध → गेरहार्ट हेन्‍रिक आरमौअर हान्सेन (1873)

Government Launch Mascots for Census 2027

Subject : GS - भूगोल - लोकसंख्या, जनगणना

सरळसेवा, रेल्वे, तलाठी, वनरक्षक, पोलीस भरती, अग्निवीर , SSC GD, MPSC, UPSC परीक्षेसाठी विचारलेले / संभाव्य महत्त्वपूर्ण प्रश्न

प्रश्न) जनगणना 2027 (Census 2027) साठी जाहीर करण्यात आलेल्या अधिकृत शुभंकरांची (Mascots) नावे कोणती ?

1. शक्ति आणि विकास

2. उन्नती आणि समृद्धी

3. प्रगती आणि विकास

4. जन आणि गण

उत्तर : प्रगती आणि विकास

📰 बातमी काय ?

• केंद्रीय गृहमंत्र्यांनी नवी दिल्ली येथे जनगणना 2027 साठी ‘प्रगती’ आणि ‘विकास’ हे अधिकृत शुभंकर (Mascots) सादर केले.

• तसेच जनगणना प्रक्रियेसाठी विविध डिजिटल साधनांचे (Digital Tools) सॉफ्ट-लाँचही करण्यात आले.

हे शुभंकर नेमकं काय आहे आणि याचा उद्देश काय ?

• सरकारने जनगणना 2027 साठी ‘प्रगती’ (महिला गणनाकर्मी) आणि ‘विकास’ (पुरुष गणनाकर्मी) हे दोन शुभंकर तयार केले आहेत.

• मुख्य उद्देश : शुभंकरांच्या माध्यमातून 2027 च्या जनगणनेशी संबंधित माहिती, उद्दिष्टे आणि महत्त्वाचे संदेश समाजाच्या विविध घटकांपर्यन्त प्रभावी आणि नागरिक-स्नेही पद्धतीने पोहोचवले जातील.

👉 हे शुभंकर " स्त्री-पुरुष समान सहभाग " आणि “ विकसित भारत 2047 ” या संकल्पनेचे प्रतीक आहेत.

📊 जनगणना 2027 कशी वेगळी आहे ?

• ही जनगणना काही महत्त्वाच्या बाबींमुळे विशेष ठरते.

👉 ही जगातील सर्वात मोठी जनगणना प्रक्रिया असेल, ज्यात सुमारे 30 लाख कर्मचारी सहभागी होतील.

👉 भारतात प्रथमच पूर्णपणे डिजिटल पद्धतीने जनगणना केली जाणार आहे. म्हणजेच कागदी पद्धतीऐवजी मोबाईल अ‍ॅप आणि ऑनलाइन प्लॅटफॉर्म वापरले जातील.

👉पहिल्यांदाच स्व-गणनेचा पर्याय याद्वारे नागरिकांना स्वतःची माहिती ऑनलाइन भरता येईल (Self-enumeration).

• उदाहरणार्थ- आपण स्वतःच आपली घराची माहिती पोर्टलवर भरू शकतो.

⚙️ जनगणनेची प्रक्रिया कशी असेल ?

• ही जनगणना दोन टप्प्यांमध्ये होईल- 

1. पहिला टप्पा → घरांची परिस्थिती आणि घरगुती सुविधांवरील डेटा गोळा केला जाईल.

2. दुसरा टप्पा → देशातील प्रत्येक व्यक्तीची लोकसंख्याशास्त्रीय, सामाजिक आणि आर्थिक माहिती नोंदवली जाईल.

• जनगणनेच्या दुसऱ्या टप्प्यात जातीशी संबंधित प्रश्न देखील समाविष्ट केले जातील.

💻 डिजिटल साधने : 

जनगणना 2027 साठी काही नवीन डिजिटल प्लॅटफॉर्म तयार करण्यात आले आहेत:

1. Houselisting Block Creator → सॅटलाईट इमेज वापरून नकाशे तयार करण्यासाठी

2. Mobile App → गणनाकर्मी डेटा गोळा करतील

3. Self Enumeration Portal → नागरिक स्वतः माहिती भरतील

4. Monitoring System → अधिकारी संपूर्ण प्रक्रिया पाहू शकतात

🌍 जनगणना का महत्त्वाची आहे ?

👉 जनगणना ही सरकारसाठी खूप महत्त्वाची असते कारण यावरच धोरणे ठरवली जातात.

उदाहरणार्थ- 

• किती शाळा, रुग्णालये आवश्यक आहेत

• कोणत्या भागात विकासाची गरज आहे

👉 यावेळी जात (Caste) संबंधित माहितीही गोळा केली जाणार आहे, त्यामुळे सामाजिक धोरणांसाठी ही माहिती खूप महत्त्वाची ठरेल.

🔑 परीक्षेच्या दृष्टीने IMP रिव्हिजन पॉईंट्स :

• जनगणना 2027 → भारताची पहिली पूर्णपणे डिजिटल जनगणना

• शुभंकर → प्रगती (महिला) आणि विकास (पुरुष)

• उद्देश → जनजागृती + लोकसहभाग वाढवणे

• जनगणना प्रक्रिया → 2 टप्पे

• नवीन घटक → जात संबंधित माहिती समावेश

• लक्ष्य → विकसित भारत 2047

• जगातील सर्वात मोठी जनगणना प्रक्रिया

• पहिल्यांदाच स्व-गणनेचा पर्याय (Self Enumeration) 

• भारतात प्रथमच पूर्णपणे डिजिटल पद्धतीने जनगणना

Khelo India Tribal Games

Subject : GS - खेळ

सरळसेवा, रेल्वे, तलाठी, वनरक्षक, पोलीस भरती, अग्निवीर , SSC GD, MPSC, UPSC परीक्षेसाठी विचारलेले / संभाव्य महत्त्वपूर्ण प्रश्न

प्रश्न) पहिली ‘खेलो इंडिया ट्रायबल गेम्स 2026’ स्पर्धा कोठे आयोजित करण्यात येणार आहे ? 

1. दिल्ली

2. महाराष्ट्र

3. छत्तीसगड

4. आंध्र प्रदेश

उत्तर : छत्तीसगड

📰 बातमी काय ?

• युवा व्यवहार व क्रीडा मंत्र्यांनी जाहीर केले की ‘खेलो इंडिया ट्रायबल गेम्स 2026’ चे आयोजन छत्तीसगडमध्ये 25 मार्च ते 6 एप्रिल 2026 दरम्यान करण्यात येणार आहे.

• हा भारतातील पहिलीच (First-Ever) राष्ट्रीय स्तरावरील क्रीडा स्पर्धा आहे जी फक्त आदिवासी खेळाडूंकरिता आयोजित केला जात आहे.

‘खेलो इंडिया ट्रायबल गेम्स’ : 

• ‘खेलो इंडिया ट्रायबल गेम्स’ हा एक विशेष क्रीडा उपक्रम आहे जो आदिवासी भागातील खेळाडूंना संधी देण्यासाठी सुरू करण्यात आला आहे.

• दुर्गम आदिवासी भागात अनेक खेळाडू चांगले खेळतात, पण त्यांना योग्य प्रशिक्षण आणि मंच मिळत नाही.

• ही स्पर्धा त्यांना राष्ट्रीय स्तरावर येण्याची संधी देते.

पहिल्या ‘खेलो इंडिया ट्रायबल गेम्स आयोजन कुठे करण्यात येणार आहे ?

• यजमान राज्य → छत्तीसगड

• प्रमुख ठिकाणे → रायपूर, जगदलपूर आणि सरगुजा

🏅 कोणते खेळ समाविष्ट आहेत ?

• या स्पर्धेत विविध खेळांचा समावेश करण्यात आला आहे.

1) पदक स्पर्धा (Medal Sports -7) : 

• अ‍ॅथलेटिक्स, फुटबॉल, हॉकी, वेटलिफ्टिंग, आर्चरी, स्विमिंग, कुस्ती

2) प्रात्यक्षिक खेळ (Demonstration Sports -2) :

• मल्लखांब आणि कबड्डी

🎯 याचा मुख्य उद्देश काय आहे ?

• या स्पर्धेमागचा मुख्य हेतू म्हणजे आदिवासी युवकांमधील क्रीडा प्रतिभा ओळखणे आणि विकसित करणे.

यामुळे -

• अधिकाधिक युवक खेळाकडे वळतील

• ग्रामीण आणि आदिवासी भागातील खेळाडूंना संधी मिळेल

• भारताला भविष्यात चांगले खेळाडू मिळतील

ही स्पर्धा का महत्त्वाचं आहे ?

• ही स्पर्धा केवळ क्रीडा कार्यक्रम नसून सामाजिकदृष्ट्याही महत्त्वाची आहे.

• आदिवासी समाजाचा सशक्तीकरण (Empowerment)

• सामाजिक समावेशन (Inclusion) वाढवणे

• दुर्गम भागातील प्रतिभेला ओळख मिळवून देणे

👉 म्हणूनच हा उपक्रम “विकसित भारत 2047” या दृष्टीनेही महत्त्वाचा आहे

‘खेलो इंडिया’ योजनेबद्दल थोडक्यात माहिती : 

‘खेलो इंडिया’ ही भारत सरकारची एक महत्त्वाची योजना आहे जी देशात क्रीडा संस्कृती वाढवण्यासाठी सुरू करण्यात आली आहे.

• या अंतर्गत विविध स्पर्धा आयोजित केल्या जातात ज्यातून नवीन खेळाडू शोधले जातात.

👉 ‘खेलो इंडिया’ उपक्रमाला 2020 मध्ये “राष्ट्रीय महत्त्वाचा कार्यक्रम” (Event of National Importance) म्हणून घोषित करण्यात आले आहे.

🔑 परीक्षेच्या दृष्टीने IMP रिव्हिजन पॉईंट्स :

• खेलो इंडिया ट्रायबल गेम्स → पहिल्यांदाच आयोजित (First-ever)

• यजमान राज्य → छत्तीसगड

• कालावधी → 25 मार्च ते 6 एप्रिल 2026

• सहभागी → फक्त आदिवासी खेळाडू

• प्रमुख उद्देश → प्रतिभा शोध + क्रीडा प्रोत्साहन

• उपक्रम → खेलो इंडिया योजना अंतर्गत

Raisina Dialogue 2026

Subject : GS - जागतिक संघटना

सरळसेवा, रेल्वे, तलाठी, वनरक्षक, पोलीस भरती, अग्निवीर , SSC GD, MPSC, UPSC परीक्षेसाठी विचारलेले / संभाव्य महत्त्वपूर्ण प्रश्न

प्रश्न) अलिकडे नवी दिल्ली येथे आयोजित करण्यात आलेल्या ‘रायसीना संवाद 2026’ (Raisina Dialogue 2026) च्या संदर्भात खालीलपैकी योग्य विधान ओळखा :

1. हा भारताचा प्रमुख बहुपक्षीय भू-राजकीयआणि भू-अर्थशास्त्रावरील संवाद मंच आहे

2. हा कार्यक्रम संयुक्त राष्ट्र संघ आयोजित करतो

3. हा दर 5 वर्षांनी आयोजित केला जातो

4. हा केवळ आशियाई देशांपुरता मर्यादित आहे

उत्तर : हा भारताचा प्रमुख बहुपक्षीय भू-राजकीयआणि भू-अर्थशास्त्रावरील संवाद मंच आहे

📰 बातमी काय ?

• भारताचे पंतप्रधान यांनी 5 मार्च 2026 रोजी नवी दिल्ली येथे ‘रायसीना संवाद 2026’ चे उद्घाटन केले.

• या परिषदेत फिनलँड चे राष्ट्राध्यक्ष अलेक्झांडर स्टब (Alexander Stubb) प्रमुख पाहुणे होते.

रायसीना संवाद म्हणजे काय ? 

• रायसीना संवाद हा भारताचा एक महत्त्वाचा आंतरराष्ट्रीय मंच आहे.

• रायसीना संवाद ही भारतीय दृष्टिकोनातून भू-राजकीय (Geopolitics) आणि भू-अर्थशास्त्रावरील (Geo-Economics) एक प्रमुख परिषद आहे. 

• रायसीना संवाद जागतिक नेते, धोरणकर्ते, शिक्षणतज्ज्ञ, उद्योग तज्ञ या क्षेत्रांतील तज्ञांना आंतरराष्ट्रीय समुदायासमोरील सर्वात आव्हानात्मक मुद्द्यांवर चर्चा करण्यासाठी आणि संवाद आणि वादविवादाद्वारे त्यांचे निराकरण करण्यासाठी एक व्यासपीठ प्रदान करते.

• उदाहरणार्थ - यात युद्ध, अर्थव्यवस्था, तंत्रज्ञान, हवामान बदल यांसारख्या विषयांवर चर्चा होते. 

रायसीना संवाद कोण आणि कोण आयोजित केला जातो ?

• ऑब्झर्व्हर रिसर्च फाउंडेशन (ORF) च्या सहकार्याने भारताच्या परराष्ट्र मंत्रालयाद्वारे (Ministry of External Affairs) दरवर्षी रायसीना संवाद आयोजित केले जातो. 

पहिला रायसीना संवाद केव्हा आयोजित करण्यात आला ? 

• पहिला रायसीना संवाद 2016 मध्ये आयोजित करण्यात आला होता आणि तेव्हापासून दरवर्षी हा संवाद आयोजित केला जातो.

या व्यासपीठाला रायसीना संवाद का म्हटले जाते ? 

• या संवादाचे नाव नवी दिल्लीतील रायसीना टेकडी (Raisina Hills) वरून ठेवण्यात आले आहे.

• रायसीना हिल्स हे सामान्यतः भारत सरकारच्या सत्तेचे केंद्र मानले जाते.

• हे नवी दिल्लीतील एक क्षेत्र आहे, जिथे भारतातील काही महत्त्वाच्या इमारती आहेत.

• रायसीना टेकडीवर भारताच्या राष्ट्रपतींचे अधिकृत निवासस्थान आहे.

• तसेच भारताच्या राष्ट्रपतींचे अधिकृत निवासस्थान असलेले राष्ट्रपती भवन आणि सचिवालय इमारत, ज्यामध्ये पंतप्रधान कार्यालय आणि इतर अनेक महत्त्वाची मंत्रालये येथेच आहेत. 

🌍 रायसीना संवाद भारतासाठी का महत्त्वाचा आहे ?

• हा मंच भारतासाठी जागतिक पातळीवर आपली भूमिका मजबूत करण्यासाठी खूप महत्त्वाचा आहे.

✍️ यामुळे भारत -

• जागतिक धोरणात्मक चर्चांमध्ये सक्रिय भूमिका घेतो

• इतर देशांशी सहकार्य वाढवतो

• स्वतःला “Global Leader” म्हणून सादर करतो

👉 म्हणूनच याची तुलना म्युनिक सुरक्षा परिषद (Munich Security Conference) सारख्या मोठ्या जागतिक परिषदांशी केली जाते.

🧩 रायसीना संवाद 2026 – प्रमुख वैशिष्ट्ये

• 11 वे संस्करण (11th Edition)

• कालावधी → 5 ते 7 मार्च 2026

• सुमारे 110 देशांतील 2700 प्रतिनिधी सहभागी

• चर्चेचे प्रकार → Panel Discussion + Closed-Door Meetings

2026 च्या 11 व्या रायसीना संवाद कार्यक्रमाची संकल्पना (थीम) काय आहे ? 

• " संस्कार - प्रतिपादन, समायोजन आणि प्रगती " ("Samskara – Assertion, Accommodation, Advancement,") ही 11 व्या रायसीना संवादाची संकल्पना आहे. 

🔑 परीक्षेच्या दृष्टीने IMP रिव्हिजन पॉईंट्स : रायसीना संवाद 2026

• रायसीना संवाद → भारताचा प्रमुख बहुपक्षीय मंच

• सुरुवात → 2016

• आयोजक → Observer Research Foundation + MEA

• ठिकाण → नवी दिल्ली

• 2026 → 11वे संस्करण

• प्रमुख पाहुणे → फिनलँड चे राष्ट्राध्यक्ष अलेक्झांडर स्टब 

• Theme 2026 → " संस्कार - प्रतिपादन, समायोजन आणि प्रगती "

Karnataka and Andhra Pradesh to Ban Social Media Use by Minors

Subject : GS - राज्यशास्त्र - केंद्र- राज्य संबंध

सरळसेवा, रेल्वे, तलाठी, वनरक्षक, पोलीस भरती, अग्निवीर , SSC GD, MPSC, UPSC परीक्षेसाठी विचारलेले / संभाव्य महत्त्वपूर्ण प्रश्न

प्रश्न) अलिकडे काही राज्यांनी अल्पवयीन मुलांसाठी सोशल मीडियावर निर्बंध लावण्याचा निर्णय घेतला. इंटरनेट आणि दूरसंचार नियमन हे प्रामुख्याने कोणत्या सूचीत येते ?

1. राज्य सूची

2. समवर्ती सूची

3. संघ सूची

4. स्थानिक सूची

उत्तर : 'संघ सूची' (Union List)

📰 बातमी काय आहे ?

• कर्नाटक आणि आंध्र प्रदेश राज्यांनी अल्पवयीन मुलांसाठी सोशल मीडियावर निर्बंध लावण्याची घोषणा केली आहे.

• यामुळे एक घटनात्मक वाद निर्माण झाला आहे कारण इंटरनेट आणि दूरसंचार नियमन हे संघ सरकारच्या अधिकारात येते.

हा वाद नेमका काय आहे ?

• राज्य सरकारांना मुलांच्या मानसिक आरोग्यावर सोशल मीडियाचा होणारा नकारात्मक परिणाम कमी करायचा आहे. म्हणून त्यांनी वयोमर्यादा ठरवून सोशल मीडिया वापरावर निर्बंध घालण्याचा प्रयत्न केला.

• पण येथे मुख्य प्रश्न असा निर्माण होतो की —

👉 “राज्यांना इंटरनेटसारख्या विषयावर थेट बंदी घालण्याचा अधिकार आहे का?”

• कारण इंटरनेट हा एक राष्ट्रीय स्तरावरील विषय आहे, त्यामुळे त्याचे नियमन केंद्र सरकार करते.

⚖️ संविधान काय सांगते ? 

• भारतीय संविधानाच्या 7व्या अनुसूचीमध्ये (7th Schedule) विषयांचे तीन भाग केले आहेत — संघ सूची (Union List), राज्य सूची (State List), समवर्ती सूची (Concurrent List).

• इंटरनेट, दूरसंचार, प्रसारण हे विषय संघ सूचीतील (Union List) Entry 31 मध्ये येतात.

👉 म्हणजेच -

• या विषयांवर कायदे करण्याचा अधिकार मुख्यतः केंद्र सरकारकडे असतो

• म्हणूनच Information Technology Act, 2000 सारखे कायदे केंद्र सरकार बनवते.

🤔 मग राज्य सरकार काय करू शकतात ?

• राज्य सरकार थेट इंटरनेट बंद करू शकत नाहीत, पण काही बाबींवर आधारित निर्णय घेऊ शकतात जसे —

1. सार्वजनिक सुव्यवस्था (Public Order)

2. सार्वजनिक आरोग्य (Public Health)

3. बालकल्याण (Child Welfare)

👉 म्हणजेच राज्य म्हणू शकते की “हे मुलांच्या हितासाठी आहे”

🧐 पण तरीही पूर्ण बंदी लावण्यासाठी केंद्राची भूमिका महत्त्वाची ठरते.

⚖️ मूलभूत अधिकारांचा मुद्दा :

✍️ सोशल मीडियावर बंदी घातल्यास मुलांच्या काही मूलभूत अधिकारांवर परिणाम होऊ शकतो —

• अभिव्यक्ती स्वातंत्र्य (Article 19(1)(a))

• माहिती मिळवण्याचा अधिकार

👉 त्यामुळे कोणतीही बंदी लावताना ती “वाजवी निर्बंध” (कलम 19(2)) या अटींमध्ये बसली पाहिजे.

म्हणजेच —

• बंदी आवश्यक आहे का?

• ती अतिशय कडक तर नाही ना? - हे तपासले जाते.

🌍 जागतिक संदर्भ :

• हा वाद फक्त भारतापुरता मर्यादित नाही.

• ऑस्ट्रेलिया हा देश मुलांसाठी सोशल मीडियावर राष्ट्रीय स्तरावर बंदी करणारा पहिला देश ठरला आहे

• इंडोनेशिया नेही 16 वर्षांखालील मुलांसाठी अशाच नियमांची घोषणा केली आहे

🔑 परीक्षेच्या दृष्टीने IMP रिव्हिजन पॉईंट्स :

• इंटरनेट / दूरसंचार → संघ सूची (Entry 31)

• राज्यांची भूमिका → सार्वजनिक सुव्यवस्था + आरोग्य + बालकल्याण

• मुख्य कायदा → Information Technology Act, 2000

• मूलभूत अधिकार → कलम 19(1)(a) (अभिव्यक्ती स्वातंत्र्य)

• निर्बंध → कलम 19(2) (वाजवी निर्बंध)

• कर्नाटक → 16 वर्षांखालील निर्बंध प्रस्ताव

• आंध्र प्रदेश → 13 वर्षांखालील निर्बंध प्रस्ताव

A Country that has eliminated Mother-to-Child transmission of HIV and syphilis

Subject : GS - विज्ञान आणि तंत्रज्ञान - रोग आणि आजार

सरळसेवा, रेल्वे, तलाठी, वनरक्षक, पोलीस भरती, अग्निवीर , SSC GD, MPSC, UPSC परीक्षेसाठी विचारलेले / संभाव्य महत्त्वपूर्ण प्रश्न

प्रश्न) युरोपियन युनियनमधील आईकडून बाळाकडे होणाऱ्या HIV आणि सिफिलिस संक्रमणाचे निर्मूलन करणारा पहिला देश कोणता ?

1. स्वीडन

2. डेन्मार्क

3. नॉर्वे

4. फिनलंड

उत्तर : डेन्मार्क

📰 बातमी काय ?

• डेन्मार्कला🇩🇰 World Health Organization कडून आईकडून बाळाकडे होणाऱ्या HIV आणि सिफिलिस संक्रमणाच्या निर्मूलनासाठी प्रमाणपत्र मिळाले आहे.

• त्यामुळे डेन्मार्क हा युरोपियन युनियनमधील पहिला देश ठरला आहे.

आईकडून बाळाकडे होणाऱ्या HIV आणि सिफिलिस संक्रमण आणि त्याचे निर्मूलना - 

• आईला जर HIV किंवा सिफिलिसचा संसर्ग असेल, तर तो बाळालाही होऊ शकतो. 

• हा संसर्ग प्रामुख्याने तीन वेळा होतो — बाळ आईच्या पोटात असताना, जन्माच्या वेळी किंवा स्तनपान करताना.

✍️ उदाहरणार्थ - एखादी गर्भवती महिला HIV पॉझिटिव्ह असेल आणि तिची वेळेवर तपासणी झाली नाही, तर बाळालाही तो संसर्ग होऊ शकतो. 

• पण जर वेळेवर तपासणी करून औषधे दिली, तर बाळ पूर्णपणे सुरक्षित जन्माला येऊ शकते.

• म्हणूनच गर्भवती महिलांची नियमित तपासणी, संसर्ग चाचणी आणि योग्य उपचार ही या संपूर्ण प्रक्रियेची किल्ली आहे.

📊 WHO हे यश कसं मोजतं ?

✍️ जागतिक आरोग्य संघटनेचे (World Health Organization) यासाठी स्पष्ट निकष दिले आहेत. - 

• आईकडून बाळाकडे संसर्ग दर 1 लाख जन्मांमागे 50 पेक्षा कमी असावा.

• 95% पेक्षा जास्त गर्भवती महिलांची तपासणी आणि उपचार झालेले असावेत.

• तरच त्या देशाला संक्रमणाच्या निर्मूलनासाठी प्रमाणपत्र दिले जाते.

🌍 संक्रमणाच्या निर्मूलनाचे महत्त्व - 

• हे यश म्हणजे पुढील पिढीला गंभीर आजारांपासून वाचवणे होय. 

• त्यामुळे बालमृत्यू कमी होतो आणि आरोग्यदायी समाज तयार होतो.

🔗 HIV आणि सिफिलिस बद्दल थोडक्यात माहिती : 

🦠 HIV - 

• HIV म्हणजे असा विषाणू आहे जो शरीराची रोगप्रतिकारक शक्ती हळूहळू कमी करतो. 

• म्हणजेच शरीराला आजारांशी लढण्याची ताकद कमी होते. 

• जर उपचार घेतले नाहीत, तर पुढे AIDS होऊ शकतो.

🦠 सिफिलिस - 

• सिफिलिस हा एक जीवाणूमुळे होणारा आजार आहे.

• सुरुवातीला तो साधा वाटतो, पण वेळेवर उपचार न घेतल्यास हृदय आणि मेंदूसारख्या महत्त्वाच्या अवयवांवर गंभीर परिणाम करू शकतो.

WHO ची स्ट्रॅटर्जी - 

• यासाठीच World Health Organization “Triple Elimination Strategy” राबवते.

• यात तीन संसर्गांवर एकत्रित नियंत्रण ठेवले जाते — HIV, सिफिलिस आणि हेपेटायटिस B.

• उदाहरणार्थ - गर्भवती महिलेची एकाच वेळी या तिन्ही आजारांसाठी तपासणी केली, तर भविष्यात बाळाला होणारा धोका मोठ्या प्रमाणात कमी करता येतो.

🔑 परीक्षेच्या दृष्टीने IMP रिव्हिजन पॉईंट्स : HIV + सिफिलिस संक्रमण

• HIV + सिफिलिस - आईकडून बाळाकडे संक्रमण → (गर्भावस्था + प्रसूती + स्तनपान)

• डेन्मार्क → संक्रमणाच्या निर्मूलन करणारा युरोपियन युनियनमधील पहिला देश 

• प्रमाणपत्र देणारी संस्था → World Health Organization

• मुख्य फोकस → गर्भवती महिलांची वेळेवर तपासणी + उपचार

• HIV → रोगप्रतिकारक शक्ती कमी करणारा विषाणू

• सिफिलिस → Treponema Pallidum जीवाणूमुळे होणारा आजार

• WHO Strategy → Triple Elimination (HIV + सिफिलिस + हेपेटायटिस B)

16th Century Bronze Statue Returned to India

Subject : GS - प्राचीन इतिहास - कला आणि संस्कृती

सरळसेवा, रेल्वे, तलाठी, वनरक्षक, पोलीस भरती, अग्निवीर , SSC GD, MPSC, UPSC परीक्षेसाठी विचारलेले / संभाव्य महत्त्वपूर्ण प्रश्न

प्रश्न) अलीकडेच, इंग्लंडमधील अश्मोलियन संग्रहालयाने --------- यांची 16 व्या शतकातील कांस्य मूर्ती भारताला परत केली आहे. 

1. संत थिरुमंगाई अल्वार 

2. संत थिरुज्ञान संबंदर

3. रामानुजाचार्य

4. आदि शंकराचार्य

उत्तर : संत थिरुमंगाई अल्वार (Saint Thirumangai Alvar)

📰 बातमी काय ?

• अलीकडेच, इंग्लंडमधील अश्मोलियन संग्रहालयाने (Ashmolean Museum) संत थिरुमंगाई अल्वार (Saint Thirumangai Alvar) यांची 16 व्या शतकातील कांस्य मूर्ती भारताला परत केली आहे. 

मूळ ठिकाण :  

• ही मूर्ती तामिळनाडूतील दिंडीगुल जिल्ह्यातील, श्री सौंदराज पेरुमल मंदिरातील (Soundararaja Perumal Temple) आहे, हे संशोधनातून स्पष्ट झाले.

• ही ओळख India Pride Project या संस्थेने 1957 मधील French Institute of Pondicherry च्या छायाचित्रांशी तुलना करून पटवून दिली.

संत थिरुमंगाई अल्वार कोण होते ?

• संत थिरुमंगाई अल्वार हे अल्वार संतांपैकी 12 वे आणि शेवटचे संत मानले जातात. 

• अल्वार हे तामिळ कवी-संत होते, ज्यांनी भगवान विष्णूच्या भक्तीला आपले जीवन अर्पण केले.

• त्यांचा काळ साधारण 8 व्या शतकातील असून वैष्णव परंपरेत त्यांना विशेष स्थान आहे.

⚔️ प्रारंभीचे जीवन – योद्धा ते संत

• संत थिरुमंगाई अल्वार यांचे मूळ नाव ‘कालियन’ होते. 

• ते कालार समुदायात (kallar community) जन्मले आणि चोल साम्राज्यात लष्करी सेनापती म्हणून काम केले. 

• त्यामुळे त्यांना “थिरुमंगाई मन्नन” ही उपाधी मिळाली.

• ते एक कुशल धनुर्धर (Archer) होते. पण पुढे त्यांच्या जीवनात आध्यात्मिक परिवर्तन होऊन ते भक्तीमार्गाकडे वळले.

📜 साहित्यिक योगदान : 

• संत थिरुमंगाई अल्वार यांना “नर्कवि पेरुमळ” (उत्कृष्ट कवी) असेही म्हटले जाते. 

• त्यांनी 1000 पेक्षा अधिक भक्तीपर पदे लिहिली.

✍️ त्यांच्या प्रमुख रचनांमध्ये - 

• पेरिया तिरुमडल (Periya Thirumadal)

• तिरुनेदुनतांडकम (Thiruneduntandakam)

• तिरुकुरुनतांडकम (Thirukuruntandakam)

• सिरीया तिरुमडल (Siriya Thirumadal)

✍️ ही सर्व रचना ‘नालयिर दिव्य प्रबंधम्’ (Nalayira Divya Prabandham) या पवित्र ग्रंथाचा भाग आहेत.

🛕 मंदिर व धार्मिक योगदान

• त्यांनी श्रीरंगम मंदिराच्या विकासात महत्त्वपूर्ण योगदान दिले. 

• असे मानले जाते की त्यांनी 108 दिव्य देशम् (Divya Desams) या विष्णूच्या पवित्र मंदिरांना भेट दिली.

• तसेच त्यांनी श्री रंगनाथ स्वामी मंदिराच्या भिंती बांधण्यातही योगदान दिले आणि भगवान रंगनाथावर स्तोत्रे लिहिली.

🌟 आध्यात्मिक महत्त्व :

• संत थिरुमंगाई अल्वार यांना विष्णूच्या “शारंग धनुष्याचे अवतार” मानले जाते. 

• त्यांच्या जीवनातून भौतिक जीवनातून भक्तीकडे झालेल्या परिवर्तनाचा संदेश मिळतो.

🔑 परीक्षेच्या दृष्टीने IMP रिव्हिजन पॉईंट्स :

• संत थिरुमंगाई अल्वार → अल्वार संतांपैकी 12 वे आणि शेवटचे संत

• अल्वार → हे तामिळ कवी-संत

• पंथ → वैष्णव पंथ (भगवान विष्णू भक्ती)

• काळ → साधारण 8 व्या शतकातील

Defence Ministry contracts worth ₹5,083 Crore

Subject : GS - संरक्षण, आंतरराष्ट्रीय करार 

सरळसेवा, रेल्वे, तलाठी, वनरक्षक, पोलीस भरती, अग्निवीर , SSC GD, MPSC, UPSC परीक्षेसाठी विचारलेले / संभाव्य महत्त्वपूर्ण प्रश्न

प्रश्न) अलीकडे संरक्षण मंत्रालयाने ₹5,083 कोटींचे महत्त्वाचे संरक्षण करार केले. त्या संदर्भात खालीलपैकी योग्य विधान कोणते ?

1. ALH Mk-III हेलिकॉप्टर रशियाकडून खरेदी केले जाईल.

2. श्तिल (Shtil) प्रणाली भारताने विकसित केली आहे.

3. श्तिल (Shtil) प्रणाली जमिनीवरील संरक्षणासाठी आहे.

4. ALH MK-III हेलिकॉप्टर पूर्णपणे भारतात डिझाइन व तयार केलेले आहे. 

उत्तर : ALH MK-III हेलिकॉप्टर पूर्णपणे भारतात डिझाइन व तयार केलेले आहे. 

📰 बातमी काय ?

• भारताच्या संरक्षण मंत्रालयाने (Ministry of Defence) ने मार्च 2026 रोजी ₹5,083 कोटींचे महत्त्वाचे संरक्षण करार केले. 

🧐 हे संरक्षण करार कोणासोबत झाले ?

1) हिंदुस्तान एरोनॉटिक्स लिमिटेड : या करारांतर्गत भारतीय तटरक्षक दलासाठी 6 प्रगत हलकी हेलिकॉप्टर (Advanced Light Helicopter – ALH MK-III) खरेदी करण्यात येणार आहेत. 

• ही हेलिकॉप्टर Hindustan Aeronautics Limited (HAL) या भारतीय कंपनीकडून घेतली जाणार आहेत.

2) रशिया : तसेच, भारतीय नौदलासाठी श्तिल (Shtil) हवाई संरक्षण क्षेपणास्त्र प्रणाली खरेदीसाठी रशियाच्या जेएससी रोसोबोरोन एक्सपोर्ट सोबतही (JSC Rosoboronexport) करार करण्यात आला आहे.

🚁 एएलएच एमके-III (ALH MK-III) म्हणजे काय?

• एएलएच एमके-III हे एक दुहेरी इंजिन असलेले आधुनिक हेलिकॉप्टर आहे.

• हे हेलिकॉप्टर समुद्रातील विविध मोहिमा पार पाडण्यासाठी तयार केले गेले आहे. 

• किनाऱ्यावरून तसेच जहाजावरून उड्डाण करण्याची त्याची क्षमता असल्यामुळे ते सागरी सुरक्षेसाठी खूप उपयुक्त ठरते.

• हा करार “Buy (Indian–IDDM)” या श्रेणीत येतो, म्हणजेच हे हेलिकॉप्टर पूर्णपणे भारतात डिझाइन व तयार केलेले आहे. 

• त्यामुळे ‘मेक इन इंडिया’ (Make in India) आणि ‘आत्मनिर्भर भारत’ (Aatmanirbhar Bharat) या उपक्रमांना मोठी चालना मिळते.

• या हेलिकॉप्टरचा उपयोग मच्छीमारांचे संरक्षण, अपतटीय प्रतिष्ठापनांची सुरक्षा आणि सागरी पर्यावरणाचे रक्षण करण्यासाठी होतो. 

🚀 श्तिल (Shtil) क्षेपणास्त्र प्रणाली म्हणजे काय ?

• श्तिल ही एक जहाजावरून कार्य करणारी मध्यम पल्ल्याची हवाई संरक्षण प्रणाली (medium-range air defence system) आहे. 

• सोप्या भाषेत सांगायचे झाले, तर ही प्रणाली समुद्रातील युद्धनौकांचे हवाई हल्ल्यांपासून संरक्षण करते.

• ही प्रणाली विमान, हेलिकॉप्टर, ड्रोन (UAV) आणि जहाजविरोधी क्षेपणास्त्रांना हवेतच नष्ट करण्यास सक्षम आहे. 

• ही प्रणाली रशियाने विकसित केली असून ती Buk क्षेपणास्त्र प्रणालीवर (Buk Missile System) आधारित आहे.

• यामध्ये Vertical Launch System (VLS) तंत्रज्ञान वापरले जाते, ज्यामुळे क्षेपणास्त्र कोणत्याही दिशेने आणि कोणत्याही हवामानात जलद गतीने प्रक्षेपित करता येते.

🔑 परीक्षेच्या दृष्टीने IMP रिव्हिजन पॉईंट्स : 

• मार्च 2026 – ₹5,083 कोटींचे संरक्षण करार

• संरक्षण मंत्रालय → दोन करार (HAL + रशिया)

• ALH Mk-III → हलकी हेलिकॉप्टर- HAL या भारतीय कंपनीकडून घेतली जाणार

• श्तिल (Shtil) हवाई संरक्षण क्षेपणास्त्र → रशियाच्या JSC रोसोबोरोन एक्सपोर्ट कडून घेतली जाणार